Kahan aa kay ruknay thay rastay! kahan mor tha! usay bhool ja

Kahan aa kay ruknay thay rastay! kahan mor tha! usay bhool ja

Wo jo mil gaya usay yaad rakh, jo nahi mila usay bhool ja

Wo teray naseeb ki barishain kisi aur chatt pay baras gayeen

Dil-e-bay khabar meri bat sun, usay bhool ja, usay bhool ja

Main to gum tha teray hi dhiyaan main, teri aas, teray gumman mein

Sabaaa keh gai meray kaan main, meray sath aa, usay bhool ja

Kaheen chak-e-jaan ka rafoo nahi, kisi aasteen pay lahoo nahi

K shaheed-e-rah-e-malal ka nahi khoon baha, usay bhool ja

Kisi aankh main nahi ashk-e-ghum, teray baad kuch bhi nahi hai kum

Tujhay zindgi nay bhula diya, tu bhi muskura, usay bhool ja

Kiyon ataa hua hai ghubaar main, ghum-e-zindgi k fishaar main

Wo jo dard tha teray bakht main, so wo ho gaya, usay bhool ja

Na wo aankh teri aankh thi, na wo khwaab hi tera khwaab tha

Dil-e-muntazir to ye kis liye, tera jaagna, usay bhool ja

Ye  jo raat din ka khail sa, isay daikh, is per yaqeen na ker

Nahi aks koi bhi mustaqil, sar-e-aaina, usay bhool ja

Jo bisat-e-jaan he ulat gaya, wo jo raastay say palat gaya

Usay rooknay say  hasool kia, usay mat bula, usay bhool ja

To ye kis liye shab-e-hijr k her sitaray main usay daikhna

Wo falak ke jis pay milay thay hum, koi or tha, usay bhool ja

Tujhay chaand ban k mila tha jo, teray sahiloon pay khila tha jo

Wo tha aik dariya wasal ka so utar gaya, usay bhool ja